أنا اقعد افرمت الهارد وافرمت الفلاشه وبرضه ألاقي المساحه اقل من المكتوب عليها، هل هما بيضحكوا علينا
الموضوع ببساطه متعلق بالحساب
البني آدم بيستخدم التعداد العشري في الارقام من 0- 9.
لكن الكمبيوتر بيستخدم النظام الثنائي 0-1ا
بالبلدي كده اتفقوا على أن الجيجابايت 1,000,000,000 بايت
بالنسبه للكمبيوتر الجيجابايت 1,073,741,824 بايت، يعني الفرق بين النظامين يعمل حوالي 73 ميجا في الجيجايا.
ليه فيه حاجة اسمها البيانات المفتوحة؟
.. فيه حاجة في الدنيا دي اسمها بيانات مفتوحة، يعني أيه مفتوحة؟
يعنيالحكومات، والمراكز البحثية، والمنظمات الأهلية توفر المعلومات والبيانات اللي بتنتجها بشكل مجاني، ومن غير تعقيدات تقنية.
يعني مش هتتعب وأنت بتدور على النت ,علشان تدخل على موقع حكومي وتسحب البيانات منه، بيقولك برضة المفروض إنها تبقى متاحة للجميع بدون تمييز، يستخدموها في اللي عايزينه.يعني مثلا أنت لو رئيس جمهورية وعايز تعمل تف من بوقت برنامج انتخابي وكدا.. هتجيب البيانات والمعلومات دي منين؟ من عندهم.
لما تتاح لك البيانات المفتوحة دي تقدر تعيد نشرها بـ”حرية”،تعريف الحرية دي هنشرحهولكم في مرة تانية بس خلونا نركز دلوقتي في معنى البيانات المفتوحة، اللي ليها شرطين وحيدين بس يقدر يفرضهم صاحب البيانات دي (الحكومة أو المؤسسة أو المركز البحثي):
*الأولاني هو إن اللي هينشر البيانات يذكر اسم مُنتجها حفاظاً على حقوقه الأدبية.
*والتاني هو إن اللي هيعيد نشرها، ينشرها بنفس رخصة النشر بتاعت المُنتِج، بدون عقد من طرفه.
ليه البيانات المفتوحة مهمة للدول؟
بالذات البيانات المفتوحة الحكومية يعني، فيه 3 نقط أساسية بتلخص الحوار ده.
النُقطة الأولى: الشفافية ( موجودة والحمد لله )
بيقولك يا أخي المواطن من دول من حقه ( اه حقة !! ) إنه يعرف الفلوس اللي بيدفعها في الضرايب حكومته بتصرفها في إيه، علشان يقرر هل توجهات الحكومة وأولوياتها دي متوافقة مع إحتياجاته ومشاكله ولا لأ.
يعني مثلا مثلا
أنت مش بتنتخب نائب البرلمان علشان يمشي مصالحك ؟
تعرف منيييين إنه بيروح يحضر كل الجلسات ويصوت لقرارات لصالحك ولا لأ، علشان تحاسبه بقى ؟!
المفترض إنه المعلومات دي كلها تبقى متاحة ليك.
النُقطة التانية: المشاركة
إتاحة البيانات بتدي الفرصة للمواطنين للمشاركة في إتخاذ القرارات وحل المشاكل اللي بتواجه الحكومة، يعني بيقولك بدل ما واحد بس يفكر في الحل ( كمسئول )، يبقى في ناس تانية بتساعده ويمكن تجيب فكرة أفضل منه كمان.
في بلاد بره في نماذج لحكومات دول ومجالس محلية لمدن مختلفة دعت المواطنين للمساهمة معاهم في تحديد شكل الموازنة وأولويات المصارف المتعددة
النُقطة التالتة .. هي الفايدة الإقتصادية
لما البيانات تكون مُتاحة للناسده بيخلي عندهم قدرة أكبر على التخطيط لمجال عملهم بشكل أفضل، علشان هيبقى عندهم معلومات عن شكل السوق المحلي وإحتياجاته ومستقبله كمان، هتفتح الطريق لإنهم يقدموا خدمات مبنية على أساس المعلومات المُقدمة ليهم، كمثال (ممكن المطورين يعملوا تطبيقات موبايل للمتاحف تعرف الناس على مقتنياتها).
ليه الدرة بتتحول فشار مع السخونية؟
حبة الدرة بيبقى جواها نسبة من المياة، ومع الحرارة… المياة بتتحول لبخار.
البخار بيعمل ضغط جوه حبة الفشار زي الحلة البريستو، وفي تلك الأثناء، النشا جوه الحبة بيتحول لماده زي الجل، ومع زياده ضغط البخار الحبة بتفرقع فتخرج النشا اللي بقت زي الجيلي وتتجمع مع بعضها.
وتنشف مع انخفاض درجه حرارتها بتعرضها للهواء.
ملاحظه:الفشار بيتعمل من زمان في مدينه مكسيكو، لقو ادلة للفشار تعود لـ 3600 قبل الميلاد.
* السينمات بدأت تقدم فشار في سنه 1912 يعني مع إنتاج أول فيلم لأوليفر تويست و البؤساء.
ليه بيعملوا تجارب على الفئران؟
تشكل الفئران حوالي 95 % من حيوانات التجارب وده لأسباب كتير.
أولاً:
انها صغيرة وسهل السيطره عليها، اليفة يعني وسهل أن الفئران تتكيف على الظروف الجديدة.
ثانياً:
عمرها قصير، من سنتين لتلاتة، وده بيسهل متابعه أجيال متتالية في فترة قصيرة.
الخصائص الجينية والبيلوجية والسلوكية متشابه في حد كبير مع الإنسان لأن الفران من الثديات التي تشارك الانسان العديد من الوظائف والخصائص.
خامساً:
في الفتره الأخيرة العلماء استطاعوا توليد فئران معدلة وراثياً تحمل الجينات المسببه للأمراض في الإنسان وطبعاً تظل أفضل نتائج التجارب على الفئران هي المعلم رشدان.
ليه المنظفات والمطهرات بيقضي على 99.9 من الجراثيم بس؟
الجرثومه دي مجننه العالم كله…
أولاً ده شيء دعائي… لان تقريباً مفيش مطهر ممكن يوصل للرقم ده
ثانياً هو مبيقولش 100 % لأن مفيش حاجه بتقضي على 100 % من أي حاجة وممكن يكون كده عشان يبان أنه حقاني وواقعي وممكن عشان يتجنب القضايا.أما بقى الواحد في المية فدي مش جرثومة واحدة دي كتير .
ليه العيون بتطلع حمرا في الصور؟!
تننتا
بعيداً عن العيون الحمرا بتاعه السهر أو الكمبيوتر الكتير
العيون بتطلع أحياناً حمرا في الصور عشان ضوء الفلاش بينور الأوعية الدمويه اللي في العين فبيطلع اللون الاحمر والموضوع ده بيبقى زياده أكتر في الضلمه لان بؤبؤ العين بيكون متسع اكتر وما بيلحقش يقفل عشان الفلاش سريع.
وإحنا صغيرين كان دايما التساؤل اللي بيصيبنا لما دراعنا أو رجلنا تنمل ( ونحس بزغزغة خفيفة فيه كدة ) هو ” فين النمل ؟ ”
بس عرفنا سبب التنميلرجلك أو إيدك ) وبينتج عنه التنميل. المهم يا سيدي انه الموضوع مش دايما لطيف زي الزغزغة كدة، أحيانا بيكون التنميل ده بسبب أمراض وإصابات خطيرة زي السكر، الزهيري، نفص فيتامين ب 12، إدمان الكحول، إصابة الحبل الشوكي، إلتهاب الأوعية الدموية، حدوث سكتة دماغية، أو خلل في جهاز المناعة.
لما تحس بإنه التنميل مستمر، أو بينتشر من طرف واحد لباقي جسمك، يبقى لازم تروح لدكتور فوراً
ليه برج بيزا مايل؟
، برج بيزا بدأوا بناءه في سنة 1173 وبعد ما وصلوا للدور التالت بدأ يميل بسبب رخاوة وهبوط في التربة المبني عليها البرج، وقفوا الشغل فيه شوية ورجعوا قالوا نحط أربع أدوار كمان علشان نعدل الميل (متعرفش كانوا بيفكروا ازاي ؟!) ورجعوا سابوه تاني وبعد كام سنة بنوا آخر دور أخيرا وحطوا الجرس في البرج، جه بعدها بشوية كتير بينيتو موسوليني وأمر إنه البرج يتعدل قاموا صبوا أسمنت في التربة وده نقلهم لمرحلة ( جه يكحلها عماها ) والبرج غاص أكتر في التربة.
كان فيه مقترحات كتير على مدار السنين اللي فاتت لتعديل البرج وكان الحل النهائي هو إزالة 38 متر مكعب من التربة من تحت الطرف المرتفع من قاعدة البرج، وتم إعلان البرج مستقر ل 300 سنة جاية على الأقل
ليه البنات بتفتح بؤهم لما بيحطوا كحل ؟!
ليه كدا! ها! ليه!
مفيش سبب أكيد حتى الآن
الحكايه انها لما تفتح شفايفها كدهوه (ايوه كده) بتشد بشره الوش وده بدوره بيشد الجلد اللي تحت العين وبيساعدها انها ما تلحوسش خدها ماسكارا، والدقن النازلة دي بتساعد على التبريق- أو بتقلل عدد الرمشات يعني- ،كما أنها وضعية تركيز.
لو حد نظره ضعيف مكن تلاقيه بيعمل الحركة دي لما يجي يقرا منغير نضارة.
ضحايا رائحة الفم الكريهة بيزيدوا واحد كل 3 ثواني!!
ليه فيه روائح فم سيئة ؟
الموضوع ده مش بسيط ولا سهل زي ما أنتم متخيلين
الموضوع أسبابه كتير، ممكن يبقى جفاف الفم، أو أكل أنواع معينة من الطعام زي الجبنة واللحمة والسمك… والبصل والتوم مننساهمش طبعا، وبرضة التدخين والبدانة وشرب الكحوليات من الحاجات المسببة ليه.
معظم الروايح دي بتظهر بسبب البروتينات اللي البكتريا المقيمة في فم سعادتك بتعالجها وبتطلع الرائحة دي.
نقولها بشكل تاني الرائحة دي بتنتج بعد ما البروتينات بيحصلها تكسير لا هوائي لأحماض أمينيةبيحصل بعدها تكسيرفتنتج غازات رائحتها كريهة.
البكتريا دي موجودة أعداد كبيرة منها في نهاية الجزء الخلفي للسان لإنه مستقر ومبيتحركش تقريبا.
فيه كلام عن إنه الفم مش المصدر الوحيد للرائحة الكريهة، ولكن يظل هو الأشهر طبعا. عندك مثلا أمراض اللثة، الأنف لما بيبقى فيه التهاب فى الجيوب الهوائية أو جسم غريب جواها، تعفن اللوّز، والمعدة.
طب إيه الحل علشان نتخلص منها؟
ممكن تعمل أكتر من حاجة، إفطر فطار صحي فيه مواد خشنة تنضف نهاية اللسان كويس.
أو نضفه مرتين في اليوم بفرشة أو كشّاطة اللسان، كُل لبان عشان جفاف الفم بيسبب زيادة في البكتريامضغ اللبان بيسبب حركة في الفم وبينتج لعاب كتير بيغسل البكتريا، فيه ناس بتمضع بذور الشمر،أعواد القرفة أو لبان المستكا و البقدونس.
اتغرغر بغسول فم
حافظ على نظافة أسنانك، وأشرب ميه كتير علشان تحافظ على معدلها في جسمك.
تعرف أن الفراولة والأناناس بتخلي ريحة الفم كويسة؟
قاتل الجراثيم. المحارب الهمام وفارس الأمهات… :الديتول
السؤال اللي حير جماهير الأطفال ولم تلتفت إليه الأمهات.. ليه الديتول بيتحول للأبيض لما بنحطه في المية وهو أصلا لونه أصفر؟ أو برتقاني
الديتول فيه عنصر نشط مُطهر “كلوروكزيلينول”، موجود بنسبة 4.8% وباقي المكونات عبارة عن خليط من مواد مختلفة بتدوب زي مركب الفينول وزيت الصنوبر الى بيقلب في المية أبيض، زي الصابون والكُحول… وفي حاجات تانية اغلبها غير قابل للذوبان ومنها النفط، لما بتنزل في المية بتتقسم لمليارات القطرات، لما الضوء بيسقط عليها بتعكسه وبينكسر في كل الاتجاهات وبيخليها تبان بيضا.
ليه ساعات لما بنيجي ننام بتحصلنا نفضة، أو بنحس أننا هنقع من على السرير؟
الإنتفاضة دي هي حركة لاإرادية الى بتحصل قبل الدخول في النوم فوراً.
بتحصل ليه؟
لما بنيجي ننام عدد ضربات القلب بتقل والعضلات بترتخي، في حالات القلق والإجهاد وشرب الكافيين أو التطبيق منغير نوم زي يومين الإمتحانات دول جسمك بيرتخي ودماغك لسه نشطة كأنك صاحي.
فالدماغ بيعمل زي صاحبك الغلس الي لما ماتردش عليه يفتكرك مت؛ فيمسكك ويهزك عشان تفوق…. وأنت تكون اصلاً بتراقب دبانة علشان تموتها.
الدماغ لما يلاقي الجسم هدي وهو لسه شغال بيروح باعت اشارات للجسم ويفهمه أنه بيقع أو توازنه بيختل (دماغك بتنهنّج يعني).
ليه الكدمات بتظهر في جسمنا ؟
اللي بيحصل بيكون ورم دموي في الأنسجة عبارة عن إنفجار للشعيرات الدموية، أو تمزق للأوردة بيخلي الدم يترشح ويتجلط وبعدها يتسرب للأنسجة الداخلية المحيطة بيها، بطائن الشعيرات المتضررة من اللي حصل ده بتطلع هرمون بيسبب ضيق الوعاء الدموي لتقليل النزيف.
الالوان بقى اللي بنشوفها دي بتيجي منين؟
لون الكدمة بيتغير نتيجة لتحطم الجزء البروتيني في الهيموجلوبين من خلايا الدم الحمرا اللي متسربه في الحيز الخارجي للخلية لـ3 حاجات بيلفردين، بيليروبين و هيموسيدرين..
أول يوم الكدمة بيبقى لونها أحمر، و ده بسبب الحديد اللي في الدم.
من اليوم التانى للخامس، بيبدأ لونها يتحول للأزرق أو القرمزى، و ده بسبب ” deoxygenated HB “.
من اليوم الخامس للسابع بيبدأ يظهر اللون الأخضر و ده بسبب البيلفردين. ومن اليوم السابع للعاشر، بيتحول الأخضر ده تدريجياً للون الأصفر و اللي سببه البيليروبين، بعد كده على اليوم العاشر لحد ال 14 بيبقى اللون البني وده بسبب الهيموسيدرين.
ليه بندمع لما بنقطع بصل؟
في غاز في البصل اسمه الـPropanethiol S-oxide.
الغاز ده لما بيتفاعل مع الإنزيمات اللي في البصل بيطلع غاز كبريتي.
كوبانيه الغازات دي لما تتجمع في العين بتعمل حمض خفيف بيهيج العين اسوأ حاجه في الحاله دي تقفل عينك عشان بتقفل على الغازات دي وهتوجعك أكتر والأسوء من كده أنك تدعك(ي) عينك وايدك كلها بصل. لو شغلت شمعه ممكن تقلل تاثير الغازات دي عشان بتروح في الوبا مع لهب الشمعة
أو تلبسي نضاره غطس أو تقطع البصل وهو تحت المية.
أو نحطها في الفريزر حبه قبل ما تقطعوها .
ليه في بروز على الكيبورد على حروف الـj و F .. أو في الكيبورد العربي الـ (ت) والـ(ب)؟
بيحصل أن الناس الى بتعرف تكتب على الكيبورد منغير ما تبص، بيتضايقوا لما مايكونش في نور.. مع انهم بيكتبوا منغير ما يبصّوا أصلاً.
عشان بنحتاج نبص على الكيبورد كل فترة عشان نعرف صوابعنا على أي مفاتيح.
فالبروز الى على الـj والـF وظيفته أنه يساعدك تعيد ظبط صوابعك على زراير الكيبورد عشان تكتب منغير ما تحتاج تبص علىه.
تعديل لم يكتب في المرة الأولى وتم اضافته:
ليه ال F ال J تحديدا عشان الوضع الصحيح لوضع الايدين على الكيبورد في اثناء الكتابه هي ان اخر صباع من الايد الشمال يبقى عند ال F واخر صباع من الايد اليمين عند ال J
ا
اهدار الطعام 